Il president da «Radgenossenschaft der Landstrasse» pretenda ch’i vegnia stgaffida ina nova plazza da dimora en il Grischun per il
pievel viagiant. Malgrà ch’il Chantun renconuscha l’impurtanza da questa pretensiun, n’èsi betg simpel da chattar in lieu adattà.
ANNALISA DEVECCHI (KEYSTONE-SDA)/FMR; LA QUOTIDIANA Glindesdi, ils 23 da mars 2026
Actualmain datti en il Grischun quatter plazzas da dimora e da transit per ils viagiants svizzers: a Cuira, Panaduz, Cazas e Ziràn-Reschen. Ina tschintgavla plazza è situada a Domat, nua che viagiants dad auters pajais vivan. Per cumparegliar: En l’entira Svizra datti 47 da quellas plazzas. En il Grischun sa chattan tut las plazzas per lung da la A13 en vischinanza dad axas da colliaziun. «Il meglier fiss per nus ina nova plazza tranter Cuira e Maiavilla», ha ditg Daniel Huber, il president da «Radgenossenschaft der Landstrasse», envers SRF. Tenor in studi da la fundaziun «In futur per ils viagiants svizzers» da l’onn 2021 duvrassan las cuminanzas viagiantas dals Sinti e Jenics en Svizra ulteriuras 20 fin 30 plazzas da dimora e 50 plazzas da transit.